‘A Malatia ‘E ll’America

‘O mariuolo ‘o mariuolo ce sta
‘o mariuolo ‘ncuorpo!
Tu statte zitto, chi t’ha ditto ‘e parlà
c’ ‘o mariuolo ‘ncuorpo?
‘A malatia ‘e ll’America
c’ è trasùta e nun se ne va
và tròva ‘e mmedicine pe’ ce salvà
Iammo a vedé ‘a televisione che fà
ce sta abbuffanno ‘e rock
e stu guaglione quann’ ‘o siénte ‘e parlà
tène ‘e ppatane ‘mmocca…
‘A malatia ‘e ll’America
c’ è trasùta e nun se ne va
e manco cu’ ‘e ccanzone ce ‘o ffanno fà…

Si chésta cosa overamente ‘a vuó sapé comm’è…
Siénteme a me!
‘A nonna mia cantava ‘ncopp’ ê carre ‘e Piedigrotta
e i’ so’ ccrisciuto cu’ ll’ americane dint’ê rrecchie
Miles Davis and Motown
I’ me magnavo ‘a pizza e me sentévo a James Brown
E nun ‘o ssaccio cchiù comme se sòna ‘a ciaramella
m’aggio scurdato tammurriate, fronne, e tarantelle
però m’aggio ‘mparato bbuono a fà chestu flow
pecché nisciuno è meglio ‘e me dint’ ‘a dance hall
Nun ce sta niente ca putimmo fà
nun simmo chiù comm’ èramo tant’anne fa
‘Nu père ‘o tenimmo ‘a ccà
‘nu père ‘o tenimmo ‘a llà
‘O core ‘int’ô ppassato e ‘a capa ‘int’â modernità
America America
Tengo ‘o mariuolo ‘ncuorpo però voglio penzà
ca ô munno avòta e gira ‘a gente vène e se ne va
America nun fosse America senza napulitane

‘O mariuolo ‘o mariuolo ce sta
nun se po’ gghì cchiù annanze!
‘A capa è fràceta e s’avess’ ‘a cagnà
pe’ nun passà cchiù ‘a strunze…
‘A malatia ‘e ll’America
c’ è trasùta e nun se ne va
ce sta levanno ll’aria pe’ respirà
‘O mariuolo ‘o mariuolo ce sta
‘o mariuolo ‘ncuorpo!
Ce stammo zitte e ce facimmo purtà
ma po’ schiattammo ‘ncuorpo…